Lo 26 d’abril, Diya Internacional d’a Visibilidat Lesbica, contaremos con la presencia de Sara Merc, artista visual afincada en Madrit, participant de prochectos como Soy la que soy, EL*C, o Hacia Dónde Mirar, y autora de Isla Ignorada.

Isla ignorada ye un prochecto documental y social que explora la identidat d’as lesbianas, empecipiando con los testimonios de mullers de distintas cheneracions y puestos d’orichen. Se tracta d’un prochecto inclusivo y diverso, que lo suyo obchectivo ye chenerar una reflexión a partir d’una serie de problematicas en común.

Como sinyala, l’autora, “en Espanya, un d’os paises mas abanzaus en materia de lechislación pro LGTB, las lesbianas tienen los mesmo dreitos que la resta d’a población, fueras de cosas muit concretas que afectan a la maternidat y la filiación. Pero muitas exercen los suyos dreitos d’amagatons. La invisibilidat se presienta bellas vegadas como libre elección, quan en realidat ye lo marcador d’una salut social deficient. Alavez, consideramos la visibilidat una necesidat, no nomas d’o colectivo lesbico, sino d’a sociedat en cheneral, que habría d’aspirar a la integración y salvaguarda de totz los suyos miembros y, en zagueras, ofreixer referents positivos a qui s’están en la huembra pa que en salgan y exerzan de tot los suyos dreitos legals y naturals”.